ಒಂದು ಮಟಮಟ ಮಧ್ಯಾಹ್ನ
ಕಿಟಕಿಯಿಂದ ಹೊರ ನೋಡುತ್ತಿದ್ದೆ ನಾ,
ಕಂಡೆ ಒಂದು ಕುಂಟ ಪಾರಿವಾಳಾನ
ಒಂಟಿ ಕಾಲಿನ ಒಂಟಿ ಪಯಣ!
ಯಾಕೋ ಆ ಹಕ್ಕಿ ತುಂಬಾ ಸಪ್ಪಗಿದೆ
ಜೊತೆಯಲಿ ಯಾರೂ ಇಲ್ಲದೆ,
ಮುದ್ದುಮುಖದಲ್ಲಿ ಮಂಕಾದ ಭಾವನೆಯು
ಪುಟ್ಟ ಮನದ ತುಂಬಾ ಆಲೋಚನೆಯು!
ಒಂಟಿ ಕಾಲು ಒಂಟಿ ಬಾಳು
ಜೊತೆಗಾರನಿಲ್ಲದ ಬೇಸರವು,
ಇಲ್ಲ ಯಾರ ಆಸರೆ, ಅಕ್ಕರೆಯು
ಆದರೂ ಹೊಟ್ಟೆಗಾಗಿ ಅಲೆದಾಟವು!
ಬಿಸಿಲ ಬೇಗೆಗೆ ದೇಹ ಬಾಡಿದಂತಿದೆ
ನೆರಳಿನ ತಂಪನ್ನು ಬಯಸುತಿದೆ,
ದಿನವೆಲ್ಲಾ ಹಾರಾಡುತ್ತಾ ಸುಸ್ತಾದಂತಿದೆ
ಹಸಿವು ನೀರಡಿಕೆಯೂ ಜೋರಾಗಿದೆ!
ಸರಿಯಾಗಿ ನಿಲ್ಲಲಾಗುತ್ತಿಲ್ಲ ಆ ಪುಟ್ಟ ಹಕ್ಕಿಗೆ
ದೇಹಭಾರವ ಎಷ್ಟು ಸಹಿಸೀತು ಒಂದೇ ಕಾಲು?
ಎಲ್ಲಾ ಇದ್ದರೂ ಕಷ್ಟ ಪಡುತಾರೆ ಮನುಷ್ಯರು
ಮೂಕ ಪಾರಿವಾಳದ ವೇದನೆ ಕೇಳೋರ್ಯಾರು?
ಹೇಳಬೇಕು ಅಂದುಕೊಂಡೆ ಅದಕೆ
ನಿನ್ನ ನೋವು ಹಂಚಿಕೊಳ್ಳೇ ನನ್ನ ಜೊತೆಗೆ!
ಆದರೆ ಅಷ್ಟರಲ್ಲೇ ಹಾರಿ ಹೋಗಿತ್ತು
ಮತ್ತೆಂದು ಮರಳಿ ಬರುವೆ ಇಲ್ಲಿಗೆ?
-ಸ್ವರು
No comments:
Post a Comment