ಅರಸಿ ಬಂದಿಹೆನು ನಿನ್ನ ಸನಿಹವನ್ನು
ತೋರಿಸೆಯಾ ಕೊಂಚ ಪ್ರೀತಿಯನ್ನು,
ನೀ ದೂರವಿದ್ದಷ್ಟು ಜೀವ ಹೋದಂತೆ ಭಾಸ
ಹತ್ತಿರವಿರಲು ಮುಖದಲ್ಲಿ ಮಂದಹಾಸ!
ನಿನ್ನ ನೆನಪಿನ ಆ ಮಧುರ ಅಲೆಗಳು
ಅಬ್ಬರಿಸುತಿದೆ ಪ್ರತಿ ಕ್ಷಣ ನನ್ನೆದೆಯಲಿ,
ಪ್ರೀತಿಯ ಸಮುದ್ರದಿ ನಾ ತೇಲುತಿರಲು
ಸಮಯವೇಕೋ ಓಡುತಿದೆ ಶರವೇಗದಲಿ!
ಒಂದೇ ಸಮನೆ ನಿನ್ನನ್ನೇ ನೋಡುತಿರಲು
ತಿಂದು ಬಿಡುವಷ್ಟು ಪ್ರೀತಿಸುವ ಬಯಕೆ,
ನಿನ್ನ ಸಿಹಿಯಾದ ಮಾತುಗಳ ಆಲಿಸುತಿರಲು
ಮುಗಿಯದಿರಲಿ ಈ ಸಮಯ ಎಂಬ ಕೋರಿಕೆ!
ನಾ ನಿನ್ನ ಹೃದಯದಲಿ ಸದಾ ಬೆಚ್ಚಗಿರಲು
ನಿನ್ನ ಪ್ರತಿ ಎದೆಬಡಿತವನು ಆಲಿಸುತಿರುವೆ,
ಆ ಬಡಿತವು ನನ್ನ ಹೆಸರನ್ನೇ ಹೇಳುತಿರಲು
ಈ ಜನ್ಮವೇ ಸಾರ್ಥಕ ಅನಿಸುತಿದೆ!
- ಸ್ವರು
No comments:
Post a Comment